ÀRÒFỌ̀ ÀSÌKÒ YÌÍ

Àsìkò yìí

Àsìkò yìí ò gbọdọ̀ pẹ́ mọ́

Bó bá pẹ́, n̄ ò lérò pé mo lè dúró.

Ó tojú sú mi

Ọkàn mi ń rẹ̀wẹ̀sì.

Àsìkò yìí ò gbọdọ̀ pẹ́ mọ́

Ara ò rokùn

Ara ò radìyẹ.

Bó bá pẹ́, n̄ ó padà sẹ́yìn.

Àsìkò yìí ò gbọdọ̀ pẹ́ mọ́

Ète ń tán-án lọ

Ìmọ̀ ń dínkù.

Ìlú ò fara rọ.

Àsìkò yìí ò gbọdọ̀ pẹ́ mọ́.

Ó sárá ilé,

Ó sárá oko.

Orí gbogbo ló ń wọ̀nà.

Àsìkò yìí ò gbọdọ̀ pẹ́ mọ́.

Ìgbà yìí ò dẹrùn fólówó.

Agogo tó ń ró kò rọgbọ fún tálákà.

Gbogbo wa là ń yẹ̀nà wò.

Àsìkò yìí ò gbọdọ̀ pẹ́ mọ́.

Kísu tó dilẹ̀ lẹ́yìn aṣunṣu jẹ.

Kí ìgbà yìí má pẹ̀ẹ́ mọ́,

Là ń tọrọ lọ́wọ́ Elédùà.

Àsìkò yìí ò gbọdọ̀ pẹ́ mọ́.

Omi orí iná kọ̀ kò hó.

Omi àmù kọ̀ kò tòrò.

Ẹnu gbogbo ń kígbe tántán.

Àsìkò yìí ò gbọdọ̀ pẹ́ mọ́.

Elédùà gbà wá o.

Wá bá wa dá sọ́rọ̀ yìí,

Kí gbogbo ìlú ó dẹ̀rọ̀.

Ṣé kò ní pẹ́ mọ́?

Ká sùn ká jí.

Ká jẹ ká mu.

Ìgbà yìí ṣé kò ní pẹ́?

Ó dọwọ́ rẹ èdùmàrè.

Ó dọwọ́ rẹ ọba adẹ́dàá.

Ìwọ lo ṣẹ̀dá àwa.

A ò leè daṣe.

Bá wa sọ̀lú dẹ̀rọ̀.

©Saintpradol✍🏾