AJOGUN

a. ORÍKÌ IKÚ

Ikú abara dúdú họhọ

Ikú òrìṣà

Ikú ìránṣẹ́ olódùmarè

Ikú kò mọ ọmọdé 

Ikú kò mọ àgbà

Afàríwísí pani

Ikú òrìṣà

b. ORÍKÌ ÈSE

Àbíkẹ̀yìn wọn léńje léńje 

Kékere tíí págbà rán níṣẹ́

Ìmùlẹ̀ àwọn ìyàmi

Èse níí bíkú

Èse níí báàrùn

Èse níí bẹ́gbà

Akọ ajá aborí gbongbo

Èse abìrù gìlọ̀

Èse má ṣe mí

N ò ní ṣìṣe.

d. ORÍKÌ Ẹ̀GBÀ

Ẹ̀gbà níí gba tọwọ́ ọmọdé 

Ẹ̀gbà níí gba tọwọ́ àgbà

Ẹ̀gbà má gbare mi dànù

Aṣọni dí oníǹkan àná

Ẹ̀gbà má gbare mi dànù

A sọlọ́mọ di àgàn alẹ́ 

Ẹ̀gbà má gbare mi dànù

Ẹ̀gbà délé òrí ó kọjú rẹ̀ sóòrùn 

Ẹ̀gbà má gbare mi dànù

Ẹ̀gbà délé kànún wọ́n dá kánún sómi.

Ẹ̀gbà má gbare mi dànù

Ẹ̀gbà délé iyọ̀ ó yí i mérùpẹ̀

Ẹ̀gbà má gbare mi dànù

e. ORÍKÌ ÌYÀMI

Ìyàmi òṣòròǹgà

Apanimáwàágún olókìkí òru

Abapága abẹ́sẹ̀ga 

Abìrìn-ẹsẹ̀-méjèèjì gà gà gà

Atorí japá 

Atìfúnjẹ̀dọ̀ 

Atìfun-jòróǹro ọ̀gàlàta

Ẹyẹ abapá gẹẹ

Ẹyẹ abẹsẹ̀ gẹẹ 

Ẹyẹ abìyẹ́-bàgẹ̀bàgẹ̀

Ẹ̀yin lòfúnni-ládìẹ-sìn-gbodidi-ẹran-lọ́wọ́-ẹni

Arógba-aṣọ-má-balẹ̀

Ọlọ́jàá ikú

Ọlọ́jàá àrùn

Ọlọ́jàá èse

Ẹ̀yin lakọ ajá aborí-póńpó

Èse abìrùgìlọ̀

Ọlọ́jàá àsápè

Ọlọ́jàá owó

Ọlọ́jàá ọmọ

Ọlọ́jàá àwòyè

Dúdú biribiri lọ́sàn

Funfun lóru

Ẹ̀yin ni ìyà mi ọ̀ṣàlàṣolo

Ẹ̀yin ni ìyà mi òṣòlòṣala

Ẹ̀yin lafínjú àdàbà tí ń jẹ láàárín òrófó.

Afínjú ẹyẹ tí ń jẹ ní gban̄gba oko.